སངས་རྒྱས་ཀྱི་མཛད་རྣམ་ཡིད་དབང་རབ་འཕྲོག

འདིར་རྨོངས་དད་དང་ཚན་རིག་གི་འཐབ་རྩོད་ཡོད།

15 January 2011 Last updated at 16:18 GMTHelp

A Minneapolis astronomy professor has suggested that the zodiac system, based on "2,000-year-old information", is all wrong.

Parke Kunkle said the Earth's wobbly orbit means it is no longer aligned to the stars in the same way as when the signs of the zodiac were first conceived.

Professor Kunkle's explanation has become an internet sensation with people panicking on social network sites about what the changes mean for their star sign.

Shelley Ackerman, spokeswoman for American Federation of Astrologers, has been inundated with emails from concerned clients, but she advises them not to over-react.

ཨོྃ་མ་ནི་པད་མེ་ཧཱུྃཿ

འཛམ་གླིང་འདིར་རང་ཉིད་ཀྱི་ནང་གི་ནོར་བུའི་ཆེད་དུ་ཡོངས་སུ་བློས་བཏང་བའི་རྒྱལ་ཁབ་གཅིག་རང་ཡོད་པ་ནི་བོད་རེད། དེས་རྙེད་དོན་ནི་ངོ་མཚར་འོས་པ་ཞིག་རེད། ཨོྃ་མ་ཎི་པདྨེ་ཧཱུྃཿ་ཞེས་པ་འདི་མཐར་ཐུག་གི་མྱོང་བ་སྟོན་བྱེད་མཆོག་ཏུ་གྱུར་བ་ཞིག་རེད། དེའི་དོན་ནི་ལྷིང་འཇགས་ཀྱི་སྒྲ་གའུ་ནང་གི་ཕ་ལམ་ལྟ་བུ་དེ་རེད། ཕྱིའི་མིག་གིས་ཇི་ལྟར་མཐོང་མི་ཐུབ་པ་བཞིན་ཕྱིའི་རྣ་བས་ཐོས་མི་ཐུབ་ན་ཡང་ལྷིང་འཇགས་ལ་ཡང་རང་ཉིད་ཀྱི་སྒྲ་དང་རོལ་མོ་ཡོད། ང་ཚོར་ཕྱིའི་དབང་པོ་དྲུག་ཡོད། འདས་པའི་སྐབས་སུ་མིས་ཕྱིའི་དབང་པོ་ལྔ་ལས་ཤེས་མེད་པས་དབང་པོ་དྲུག་པ་ནི་གསར་རྙེད་ཅིག་རེད། དེ་ནི་ཁྱེད་རང་གི་རྣ་བའི་ནང་དུ་ཡོད་པས་མི་རྣམས་ཀྱིས་དེ་མ་རྙེད་པ་རེད། དེ་ནི་དོ་མཉམ་པའི་ཚོར་བ་དེ་རེད། ཁྱེད་རང་མགོ་ཡུར་འཁོར་བ་དང་། ར་བཟི་བའི་སྐབས་སུ་ཁྱེད་རང་གི་དོ་མཉམ་པའི་ཚོར་བ་ལ་ཤུགས་རྐྱེན་ཐེབས་པ་རེད། ཕྱིའི་དབང་པོ་དྲུག་པོ་འདི་ཕྱིའི་དངོས་པོ་མྱོང་ཆེད་དུ་ཡིན་པ་བཞིན་ནང་གི་དབང་པོ་དྲུག་པོ་འདི་ཡང་ནང་གི་དངོས་པོ་མྱོང་ཆེད་དུ་དང་། མཐོང་ཆེད། ཐོས་ཆེད། ཚོར་ཆེད་དུ་རེད། དེ་ནི་ཕྱི་ཡི་མིག་དབང་ལ་མི་སྣང་ན་ཡང་ནང་གི་མིག་དབང་ལ་སྣང་གི་རེད། ཁྱོད་རང་གིས་ཕྱིའི་ཚོར་བས་ཐོགས་རེག་བྱེད་མི་ཐུབ་ན་ཡང་ནང་གི་དབང་པོ་ནི་དབྱེར་མེད་དུ་འགྱུར་།

ཨོྃ་ནི་ཡོད་ཚད་མི་སྣང་བར་གྱུར་དུས་ཀྱི་སྒྲ་དེ་རེད། བསམ་གཞིགས་མེད་པ། རྨི་ལམ་མེད་པ། རེ་ལྟོས་མེད་པ། འདོད་འདུན་མེད་པ། མཐའ་ན་ཆུ་གཉེར་ཕྲ་མོ་ཞིག་ཀྱང་མེད་པ། ཁྱོད་རང་གི་འདུ་ཤེས་ཀྱི་མཚོ་མོ་ཡོངས་སུ་ལྷིང་འཇགས་སུ་གྱུར་ནས་མེ་ལོང་ཉིད་དུ་གྱུར་བའི་དུས་སྐབས་དཀོན་པོ་དེ་འདྲའི་སྐབས་སུ་ཁྱོད་ཀྱིས་གཞི་ནས་ལྷིང་འཇགས་ཀྱི་སྒྲ་དེ་ཐོས། དེ་ནི་ཆེས་རིན་ཐང་ལྡན་པའི་མྱོང་ཚོར་དེ་ཡིན། གང་ལགས་ཤེ་ན་དེས་ནང་གི་རོལ་མོ་སྟོན་པ་ཙམ་དུ་མ་ཟད། དེས་ནང་ནི་ཞི་འཇམ། དགའ་བ། བདེ་བ། སོགས་ཀྱིས་བལྟམས་པ་དེ་ཡང་སྟོན། འདི་ཐམས་ཅད་ཨོྃ་གྱི་རོལ་མོའི་ནང་དུ་ཐིམ་ནས་ཡོད། ཁྱོད་ཀྱིས་མྱོང་བ་དེ་བརྗོད་དུ་མེད། གལ་སྲིད་ཁྱོད་ཀྱིས་བརྗོད་ན་ཁྱོད་ཀྱིས་དོན་ངོ་མ་དེ་འཆོར་བར་འགྱུར་། ཁྱོད་ཀྱིས་ཉན་དགོས། ཁྱོད་རང་ཞི་ཞིང་འཇགས་པར་གནས་དགོས། གློ་བུར་དུ་ཁྱོད་ཀྱི་མཐའ་ཡོངས་སུ་ཧ་ཅང་ཕྲ་བའི་སྟངས་སྟབས་ཤིག་གིས་སྐོར་ནས་ཡོད། ནམ་ཞིག་ཁྱོད་ཀྱིས་དེ་ཐོས་པའི་སྐབས་སུ་ཁྱོད་རང་གཞི་གྲུབ་ཀྱི་གསང་བར་ཞུགས་པ་ཡིན། ཁྱོད་རང་ཧ་ཅང་ཕྲ་བར་གྱུར་བས་ད་ནི་ཁྱོད་ལ་ལྐོག་གྱུར་གྱི་གནས་ཐམས་ཅད་མངོན་པར་གྱུར། གཞི་གྲུབ་ཀྱིས་ཁྱོད་རང་གྲ་སྒྲིག་མ་ཐུབ་པར་དུ་སྒུག་ཀྱི་རེད། ལྷིང་འཇགས་མཐར་ཐུག་གི་སྒྲ་དེ་ཨོྃ་ཞེས་པ་འདི་ལ་འདྲ་སེ་ཞིག་ཡོད་པའི་གནད་དོན་འདིར་ཤར་ཕྱོགས་པའི་ཆོས་ལུགས་ཡོད་དོ་ཅོག་གིས་མོས་མཐུན་བྱེད།

ཨོྃ་ཞེས་པའི་ཚིག་འདི་སྐད་ཡིག་གཅིག་གི་ནང་དུ་ཡང་ཡིག་གཟུགས་སུ་མི་འབྲི། གང་ལགས་ཤེ་ན་འདི་ནི་སྐད་ཡིག་གི་ཁོངས་སུ་མི་གཏོགས། འདི་ནི་མཚོན་རྟགས་ཀྱིས་འབྲི་བ་ཡིན། དེའི་ཕྱིར་ལེགས་སྦྱར། ཟུར་ཆགས། པ་ལི། བོད་ཡིག་སོགས་ཚང་མའི་ནང་དུ་མཚོན་རྟགས་འདི་གཅིག་རང་འབྲི་བ་ཡིན། གང་ལགས་ཤེ་ན་དུས་སྐབས་ཐམས་ཅད་ཀྱི་ནོར་འཁྲུལ་ཡོངས་རྫོགས་མཐར་མཉམ་མྱོང་གཅིག་གི་ཐོག་ཏུ་སླེབས་ཀྱི་ཡོད་པ་སྟེ། འདི་ནི་ང་ཚོ་འདི་ངོགས་ཀྱི་འཛམ་གླིང་གི་ཆ་ཤས་ཤིག་རེད་མེད། དེའི་ཕྱིར་འདི་ཡིག་གཟུགས་ཀྱི་ནང་དུ་མི་འབྲི། དེ་ལ་རང་ཉིད་ཀྱི་མཚོན་རྟགས་ཤིག་ཡོད་དགོས་ཤིང་དེ་ནི་སྐད་ཡིག་གི་མཐའ་ལས་བརྒལ་ཡོད།

ཤེས་བྱ་རིག་པའི་ཐོག་ནས་བསམ་བློ་བཏང་ན་དེས་དོན་དག་གང་ཡང་སྟོན་གྱི་མེད་ཀྱང་། བསམ་བློའི་འཕེལ་རྒྱས་ཀྱི་ཆ་ནས་གཞིགས་ན་དེའི་དོན་ནི་མཐའ་ཡས་སོ།ཨ 

སྨྲ་བརྗོད་རང་དབང་གི་རྣམ་བཤད།

“ཁ་བརྡས་སྨྲ་བརྗོད་རང་དབང་དང་གང་ཟག་སྒེར་ལ་དམོད་མོ་བྱེད་པ་གཉིས་ཀྱི་བར་ན་གནས་པའི་རྣོ་སྐུད་ཀྱི་སྐུད་ལམ་ཕྲ་མོ་དེའི་སྟེང་གོམ་པའི་འདེགས་འཇོག་འཁྱོར་ཞོར་དང་འགྲོ་ཞོར་བྱས་ནས་ད་བར་དུ་སླེབས་པ་རེད།”་ཁ་བརྡ་དྲ་ཚིགས་ལས་དྲངས།  

ཉེ་ཆར་དོན་དག་ཅིག་གི་བྱུང་རབས་ལ་བརྟེན་ནས་སྨྲ་བརྗོད་རང་དབང་དང་གང་བྱུང་མཚང་འབྲུ་གཉིས་ཀྱི་ས་མཚམས་སྐྲ་ཉག་ལས་ཕྲ་བས་སུས་ཀྱང་སོ་སོར་འབྱེད་མི་ཐུབ་པར་བཤད་པ་དེའི་ས་མཚམས་ཤིག་ཁོ་བོས་ལྟས་དབང་གིས་རྙེད་པའི་སྣང་བ་བྱུང་། གལ་སྲིད་ངོ་མ་དེ་ལྟར་ཡིན་ན་འདི་ནི་ཚགས་པར་ལས་ཁུང་ཁག་དང་། ཟིན་བྲིས་པ། དཔྱད་བརྗོད་པ་སོགས་མང་པོ་ཞིག་ལ་ཕན་ཐོགས་འབྱུང་བར་ཐེ་ཚོམ་མེད་པས་དེ་ཁོ་བོས་ཅུང་ཟད་ཞུ་བར་འདོད།

དམངས་གཙོའི་སྲིད་གཞུང་གི་སྟོབས་ཤུགས་ནི་སྨྲ་བརྗོད་རང་དབང་ཡིན། སྨྲ་བརྗོད་རང་དབང་མེད་ན་དམངས་གཙོའི་སྲིད་གཞུང་གནས་མི་ཐུབ་པས་དམངས་གཙོའི་སྲིད་གཞུང་ནི་སྨྲ་བརྗོད་རང་དབང་གི་རྨང་གཞི་ཁོ་ན་ལ་རྟེན་ནས་གནས་ཡོད། སྨྲ་བརྗོད་རང་དབང་ལ་ཚད་མཐོ་དམན་ཡོད་པ་ལས་ཐ་ཤལ་གྱི་སྨྲ་བརྗོད་རང་དབང་ཞིག་མེད་པར་འདོད།

སྨྲ་བརྗོད། སྨྲ་བརྗོད་ནི་འགྲོ་བ་མི་སེམས་ཅན་གཞན་ལས་ཁྱད་དུ་འཕགས་པར་བྱེད་པའི་ཡོན་ཏན་གཅིག་བུ་དེ་ཡིན། སྨྲ་བརྗོད་ཀྱི་ནུས་པ་ལ་བརྟེན་ནས་མི་བུ་རྣམས་སེམས་ཅན་གཞན་དང་ལྷག་པར་དུ་རང་རིགས་སྤྲ་སྤྲེལ་རྣམས་ལས་སྔོན་ཐོན་དུ་གྱུར་ཡོད། སྨྲ་བརྗོད་ཀྱི་ནུས་པ་ལ་བརྟེན་ནས་མེ་ལས་མེ་མཆེད་པ་བཞིན་མི་བུ་དག་གི་ཤེས་རིག་གི་རྒྱ་དང་དཔངས་ཆེ་བ་ནས་ཆེ་བར་སོང་ཡོད། དེས་ན་སྨྲ་བརྗོད་ལ་ཚད་བཀག་བྱེད་པ་ནི་མི་བུའི་གཞི་རྩའི་ནུས་བ་པ་ཕོགས་ཐུག་གཏོང་བ་ཡིན་ཞིང་། ཆོས་ལུགས་གསར་གཏོད་པ་དག་གིས་གནད་དོན་འདི་བསམ་བློར་མ་འཁོར་བ་མ་གཏོགས་གལ་སྲིད་འཁོར་ཡོད་ན་སྨྲ་བརྗོད་ལ་ཚད་བཀག་བྱེད་པ་ནི་དམྱལ་བ་རྡོར་གདན་དུ་ལན་སྟོང་ལ་སྐྱེ་བྱེད་ཀྱི་སྡིག་པ་རླབས་པོ་ཆེར་བགྲང་ཡོད་ངེས།

རང་དབང་།  རང་དབང་ནི་སྒྲིག་ཁྲིམས་ཀྱི་ཆེས་མཐོའི་ཚད་གཞི་དེ་ཡིན་པར་འགྲེལ་མཁན་ཡོད། སྒྲིག་ཁྲིམས་དང་རང་དབང་འགལ་འདུར་མཐོར་བ་ནི་ཁྲིམས་དང་རང་དབང་གཉིས་ཀའི་གོ་བ་མ་ལོན་པའི་རྟགས་ཡིན་འདུག ཁྲིམས་ནི་རང་དབང་དང་རང་དབང་ནི་ཁྲིམས་ཡིན། རང་དབང་དང་ར་ལང་ཆ་ལང་ཕྱོགས་འདྲ་བ་འམ་ས་འབྲེལ་དུ་མཐོང་བ་ནི་རང་དབང་གི་གོ་བ་མ་ལོན་པ་ཡིན། རང་དབང་གི་དོན་བྱེད་འདོད་པ་གང་ཡོད་དེ་བྱེད་པ་ལ་གོ་བ་ལོས་ཡིན་ཀྱང་། བྱེད་འདོད་པ་ཞེས་པ་ཉིད་བྱེད་པའི་དགོས་པ་ཡོད་ལ་གོ་དགོས་པ་ལས་དགོས་པ་མེད་པར་གང་ཐོན་བྱེད་པ་ལ་གོ་རྒྱུ་མིན། དེས་ན་དགོས་པ་ཡོད་པའི་བྱ་ཞིག་འགོག་པ་ནི་གོང་བཞིན་སྲིད་ཀྱིས་བལྟས་ན་ཉེས་ཅན་དང་། ཆོས་ཀྱིས་བལྟས་ན་སྡིག་ཅན་དུ་ལོས་འགྱུར་། དེ་གཉིས་ནི་སྨྲ་བརྗོད་དང་རང་དབང་གཉིས་ཀྱི་རང་གི་གོ་བ་ལོན་ཚོད་དེ་ཡིན།

སྨྲ་བརྗོད་རང་དབང་གི་གོ་བ། ད་ནི་སྐབས་དོན་སྨྲ་བརྗོད་རང་དབང་གི་སྐོར་ལ་བསམ་ཚུལ་དེ་ཞུ། གོང་དུ་བཤད་པ་དང་ཕྱོགས་མཐུན་པར་སྨྲ་བརྗོད་རང་དབང་གི་གོ་དོན་དང་ཚད་བཀག་གི་སྐོར་ལ་ཅུང་ཟད་ཞུ། སྤྱིར་སྨྲ་བརྗོད་རང་དབང་ལ་སྒྲ་ཡངས་དོག་གི་འཇུག་པ་གཉིས་སམ་ཚད་མཐོ་དམན་གཉིས་སུ་ཡོད་པར་སྣང་ན་ཡང་ངས་གོ་བའི་སྨྲ་བརྗོད་རང་དབང་གི་དོན་ནི་མདོར་བསྡུས་ན་གང་ཡང་བཤད་ཆོག་པ་དེ་ཡིན། དེ་ནི་ཚད་མཐོ་བའི་དབང་དུ་བྱས་པ་ཡིན། སྨྲ་བརྗོད་རང་དབང་ལ་བཤད་རུང་མ་རུང་གི་ས་མཚམས་ཡེ་ནས་མེད་པར་གང་བཤད་འདོད་པ་བཤད་ཆོག་པ་ལ་གོ་བ་ཡིན་ན་ཡང་སྒྲ་དོག་འཇུག་གི་དབང་དུ་བྱས་ན་སྨྲ་བརྗོད་རང་དབང་ལ་ཚད་བཀག་ཅུང་ཟད་ཀྱང་མེད་པ་འང་མིན། ངས་བཤད་དོན་ནི་སྨྲ་བརྗོད་རང་དབང་ལ་ཚད་བཀག་ཡོད་པ་ནི་སྨྲ་པོ་རང་ཉིད་ལས་གཞན་མེད་པ་དང་། ཚད་བཀག་མེད་པ་ནི་རང་ཉིད་ལས་གཞན་པའི་གང་ཟག་གཉིས་པའམ་གསུམ་པ་སུ་གང་ཞིག་གིས་ཀྱང་ཚད་བཀག་ཡེ་ནས་ཡོད་མི་ཆོག་པ་དེ་ཡིན།

ཡང་བསྐྱར་བཤད་ན་ཅི་སྟེ་སྨྲ་བརྗོད་རང་དབང་ལ་ཚད་བཀག་བྱེད་ན་སྨྲ་པ་པོ་རང་ངོས་ནས་དཔྱད་རིག་དང་འགན་ཁུར་གྱི་བསམ་བློས་ཚད་བཀག་བྱེད་དགོས་པ་ཡིན། དེ་ལས་གཞན་པའི་ཚད་བཀག་ག་འདྲ་ཞིག་ཡིན་རུང་སྨྲ་བརྗོད་རང་དབང་ལ་བརྡལ་བཤིག་བཏང་བ་རང་ཡིན། རྒྱུ་མཚན་ནི་ནམ་ཞིག་གང་ཟག་ཀ་བས་གང་ཟག་ཁ་བ་ལ་འདི་བཤད་ཆོག་དང་འདི་བཤད་མི་ཆོག་གི་བཀའ་བཏང་བ་དེའི་ཚེ་གང་ཟག་ཁ་བའི་ཆེ་མཐོང་དང་རིན་ཐང་ལ་བརྩིས་མེད་བཏང་བ་ཡིན། དེ་ལྟར་བཤད་ཆོག་ན་གང་ཟག་ཁ་བ་ལ་སྨྲ་བརྗོད་རང་དབང་དགོས་དོན་མེད་དེ། གང་ཟག་ཀ་བས་ཐག་གིས་གཅོད་ཆོག་པས་སོ། རྒྱལ་ཁབ་ཕན་ཚུན་གཅིག་གི་ནང་སྲིད་ལ་གཞན་གྱིས་ཐེ་གཏོགས་བྱེད་མི་ཆོག་པ་བཞིན་གང་ཟག་ཕན་ཚུན་གཅིག་གི་སྒེར་གྱི་རྣམ་འགྱུར་ལ་གཞན་གྱིས་ཐེ་གཏོགས་བྱེད་འོས་པ་ཡེ་ནས་མེད། དེའི་ཕྱིར་སྨྲ་བརྗོད་རང་དབང་གི་ཚད་མཐོ་བའི་དབང་དུ་བྱས་ན་སྨྲ་བརྗོད་ལ་ཚད་བཀག་བྱེད་མཁན་ནི་སྨྲ་པ་པོ་རང་ཉིད་ལས་གཞན་སུ་ཡང་ཡོད་མི་ཆོག ས་གང་ཡང་བཤད་ཆོག་པ་དེ་རེད།

ཚད་བཀག  སྒྲ་དོག་འཇུག་གི་དབང་དུ་བྱས་ན་ད་སྐབས་སྨྲ་བརྗོད་རང་དབང་གི་ཁོངས་མི་འགྲོ་བའི་རིགས་འགའ་ཞིག་ཡོད། འདི་དག་ནི་ཉན་པ་པོའི་གནས་ཚད་ལ་བལྟོས་ནས་ཚད་བཀག་ཆེད་དུ་བཟོས་པ་ཞིག་ཡིན་པ་ལས་གཞི་རྩའི་སྨྲ་བརྗོད་རང་གི་མཚན་ཉིད་ངོ་མར་ཁོ་བོས་ནམ་ཡང་མི་འདོད། འོན་ཀྱང་དགོས་དབང་གིས་བཞག་པའི་ཚད་བཀག་འདི་དག་ནི་སྨྲ་པ་པོ་དག་གིས་ངེས་པར་དུ་ཉམས་འཇོག་བྱེད་དགོས། དེ་དག་ནི་སྨྲ་བརྗོད་གང་ཞིག་ལ་“མངོན་གསལ་གྱི་ཉེན་ཁ་ཡོད་པ།”་ཞེས་གང་ཟག་དང་སྤྱི་ཚོགས་ཀྱི་བདེ་འཇགས་ལ་གནོད་པ་ཚབ་ཆེན་ཡོད་པ་ཡིན་ན་བཀག་འགོགས་བྱེད་ཆོག་པ་ཡིན། བཀག་འགོགས་ཞེས་པ་ནི་ཉེ་ཆར་རྡ་ས་མདོ་སྨད་རྒྱུན་ལས་ཀྱིས་བྱེད་སྟངས་ཏེ་སྡིག་ར་སྐུལ་བའི་ལས་དེ་འདྲ་མིན་པར་དཔར་སྐྲུན་མི་བྱེད་པ་སོགས་ཀྱི་ཐབས་ལམ་སྤྱོད་རྒྱུ་ཡིན། སྨྲ་བརྗོད་རང་དབང་སྒྲ་དོག་འཇུག་གི་དབང་དུ་བྱས་པ་ཚད་བཀག་ཅན་འདིའི་ནང་དུ་མཚང་འབྲུ་དང་ཆགས་སྲེད་ཀྱི་གཏམ་ཀྱང་ཚུད་ཡོད།

སྟབས་མ་ལེགས་པ། སྨྲ་བ་པོ་ལ་འགན་ཁུར་གྱི་བསམ་བློ་མེད་ན་སྟབས་མ་ལེགས་པ་ཡིན་པ་ལས་ཐབས་ཤེས་གང་ཡང་མེད། སྨྲ་བརྗོད་རང་དབང་ནི་ཁྲིམས་ལ་སྦྱོར་བའི་འཇིགས་སྣང་མེད་པར་བརྗོད་ཆོག་པ་ལ་ཟེར་བ་ཡིན་པས་སྨྲ་པ་པོས་རང་ཉིད་ཁྲིམས་ལ་སྦྱོར་མི་འོང་བའི་གདེངས་ཚོད་ཀྱིས་བཤད་མི་འོས་པ་ལ་བཤད་ལུང་བཤད་བརྒྱ་བཤད་རུང་ཁྲིམས་ཐོག་ནས་འགན་སྲུང་ཡོད་དགོས། གལ་སྲིད་ཁྱེད་ལ་སྨྲ་བ་པོ་དེའི་སེམས་སུ་འགན་འཁུར་གྱི་བསམ་བློ་དེ་བཙན་ཐབས་ཀྱིས་སྐྲུན་ཐུབ་ཀྱི་ནུས་པ་ཡོད་ན་ཁྱེད་ཀྱིས་ཁོའི་སེམས་སུ་དེ་སྐྲུན་དགོས་པ་ནི་ཁྱེད་ཀྱི་འོས་འགན་ཡིན། སྨྲ་བརྗོད་རང་དབང་ཡོངས་སུ་ལོངས་སྤྱོད་པ་ལ་དེའི་སྤྱོད་ཡུལ་དུ་རུང་བའི་སྤྱི་ཚོགས་ཤིག་འགྲུབ་དགོས་པ་ལས། དམངས་གཙོའི་ལམ་ལུགས་འགྲོ་བཞིན་པའི་སྤྱི་ཚོགས་ཡིན་པས་སྨྲ་བརྗོད་རང་དབང་ཡོད་དགོས་ཞེས་གང་བྱུང་བཤད་ན་མི་འགྲིག འོན་ཀྱང་དེ་ནི་སྨྲ་བརྗོད་རང་དབང་གི་ལོངས་སྤྱོད་པ་པོའི་མཚན་ཉིད་མ་ཚང་བའི་སྐྱོན་ཞིག་ལས་སྨྲ་བརྗོད་རང་དབང་གི་ངོ་བོ་ག་ལ་ཡིན། འདིར་མི་འགྲིག་ཅེས་པ་ཡང་སྨྲ་བརྗོད་རང་དབང་གི་མཚན་ཉིད་དང་འགལ་བས་མི་འགྲིག་ཅེས་པ་མིན་པར་གནས་སྐབས་གནས་སྟངས་ཀྱི་དབང་གིས་སྨྲ་བ་པོའི་དོན་དག་སྨྲས་པའི་དགོས་པ་མ་འགྲུབ་པ་སོགས་དོན་དག་མི་དགོས་པ་གཞན་འབྱུང་སྲིད་པས་མི་འགྲིག་ཅེས་བཤད་པ་ཡིན། གོང་དུ་སྨྲ་བརྗོད་རང་དབང་ཚད་མཐོ་དམན་བཤད་དགོས་པ་དེ་ཡང་འདིའི་རྐྱེན་གྱིས་ཡིན། མི་རྣམས་གོ་རྟོགས་ཇེ་མཐོར་སོང་ན་ཚད་དམའ་བའི་སྨྲ་བརྗོད་རང་དབང་འདི་དགོས་དོན་མེད། ཉན་པ་པོས་རང་རང་གི་རྣམ་རིག་བེད་སྤྱད་ནས་གཏམ་གང་ཞིག་བདག་པོ་རྒྱག་རིན་ཡོད་མེད་ཀྱི་བླང་དོར་འབྱེད་ཐུབ།

དམིགས་བསལ།  སྨྲ་བརྗོད་རང་དབང་ནི་སྐྱེ་བོ་སུ་ཡང་གི་སྐྱེས་ཐོབ་ཀྱི་ཐོབ་ཐང་ཡིན་པས་སུ་གང་གིས་འཕྲོག་དབང་མེད། འོན་ཀྱང་སྨྲ་བརྗོད་རང་དབང་ཆ་ཚང་བར་ལོངས་སུ་སྤྱོད་དབང་མེད་པའི་སྐྱེ་བོ་རེ་འགའ་ནི་ངེས་པར་དུ་ཡོད། དེ་དག་ནི་གཞན་གྱིས་བཙན་བསྐུལ་གྱིས་བཞག་པ་མིན་པར་རང་མོས་དངས་བླངས་ཀྱིས་འཛུལ་བ་ཡིན། དེ་དག་ནི་སྐྱེ་བོ་གང་ཞིག་གི་ངག་ལས་བྱུང་བའི་གཏམ་ལ་ཁྲིམས་ཐོག་ནས་ཕན་གནོད་འདྲེན་ཐུབ་པའི་རིགས་ལ་བཤད་པ་ཡིན། སྐྱེ་བོ་གང་ཞིག་ཡུལ་གྱི་གོ་གནས་གལ་ཆེན་དུ་བསྡད་ཡོད་མཁན་དང་། ཚོགས་པ་བྱེ་བྲག་ཅིག་གི་ནང་དུ་ཞུགས་ཡོད་པ། རང་བཞིན་གྱིས་ཁོའི་སྐད་ཆ་ལ་གནད་འགག་ཅན་དུ་གྱུར་བའི་མི་སྣ་རྣམས་ལ་སྨྲ་བརྗོད་རང་གི་ཐོབ་ཐང་ཆ་ཚང་བ་ཞིག་ལོངས་སུ་སྦྱོད་རྒྱུ་མེད། དང་པོ་ནི་དཔེར་ན་དཔལ་ལྡན་བཀའ་བློན་ཁྲི་བ་སོགས་བོད་གཞུང་གི་གནད་ཡོད་མི་སྣ་དང་། གཉིས་པ་ནི་བོད་ཀྱི་གཞོན་ནུ་ཚོགས་པའི་ཚོགས་མི་སོགས། གསུམ་པ་ནི་ཆབ་སྲིད་བཙོན་པ་མིང་གྲགས་ཅན་རྟ་ནག་འཇིགས་མེད་བཟང་པོ་ལྟ་བུ་སོགས་ཡིན། འོན་ཀྱང་འདི་དག་ལ་ཡང་རང་རང་གི་འབྲེལ་ཡོད་ཀྱི་གནད་དོན་ལ་ཁྲིམས་ཐོག་ནས་ཤུགས་རྐྱེན་སྤྲོད་པའི་གནད་དོན་གྱི་སྐོར་ལ་གང་དྲན་བཤད་མི་འོས་པ་ལས་གནད་དོན་གཞན་གྱི་སྐོར་ལ་གང་བཤད་ལ་སྨྲ་བརྗོད་རང་དབང་གི་ཐོབ་ཐང་ལོས་ཡོད།

ཅི་སྟེ་སྨྲ་བརྗོད་རང་དབང་གི་ཐོབ་ཐང་ཆ་ཚང་བར་ལོངས་སུ་སྦྱོད་འདོད་ན་རང་ཉིད་གང་ཟག་དཀྱུས་མའི་གོ་བབས་ངེས་པར་དུ་ལེན་དགོས། དེས་ན་སྨྲ་བརྗོད་རང་དབང་གི་ཐོབ་ཐང་ཡོངས་སུ་རྫོགས་པ་ལོངས་སུ་སྤྱོད་རྒྱུ་ཡོད་མཁན་ནི་མང་ཚོགས་དཀྱུས་མ་ལ་གོ་བ་ཡིན། ཁྲིམས་ཐོག་ནས་གནད་འགག་ཅན་གྱི་སྐད་ཆ་ནི་སྐྱེ་བོ་ཀུན་ལ་ཡོད། འོན་ཀྱང་དེ་ལ་ཕན་གནོད་གང་དུ་འགྱུར་བ་སྐྱེ་བོ་རང་རང་གིས་འགན་འཁུར་དགོས། རང་ཉིད་ལ་ཁྲིམས་ཐོག་ནས་གནོད་པ་འབྱུང་བའི་སེམས་ཁྲལ་མེད་ན་གང་བཤད་འདོད་པ་ཆོག་པ་ཡིན།

མཚང་འབྲུ།  མི་གཞི་ལ་མཚང་འབྲུ་དང་སྨྲ་བརྗོད་རང་དབང་གཉིས་ལ་འབྲེལ་བ་ཧ་ལམ་མེད། རྒྱུ་མཚན་མེད་པར་མི་གཞི་ལ་མཚང་འབྲུ་བྱེད་པ་ནི་སྨྲ་བརྗོད་རང་དབང་གི་ནང་ཚུད་དུ་མེད་ངེས། རྒྱུ་མཚན་ནི་དེའི་དམིགས་ཡུལ་ནིི་སྤྱི་ཚོགས་དབྱེན་སྦྱོར་རམ་མི་གཞི་དམའ་འབེབས་བྱེད་རྒྱུ་ཙམ་ཡིན་པའི་དབང་གིས་ཡིན། འོན་ན་གང་ཞིག་གི་དམིགས་ཡུལ་དེ་མི་གཞི་ལ་དམའ་འབེབས་ཡིན་པ་དང་མིན་གྱི་ཁྱད་པར་འབྱེད་རྒྱུ་དེ་གནད་འགག་ཏུ་གྱུར་བ་ཡིན། སྨྲ་བརྗོད་གང་ཞིག་གི་དམིགས་ཡུལ་དེ་ཙམ་ཡིན་ན་སྨྲ་བརྗོད་རང་དབང་དུ་མི་འགྲོ་བ་དང་དེ་མིན་པར་ལས་བརྒལ་བའི་དོན་དག་སྨྲ་བ་པོས་ལེགས་ཕྱོགས་ལ་དམིགས་པ་ཞིག་ཡིན་ན་སྨྲ་བརྗོད་རང་དབང་གི་ནང་དུ་ཚུད་དགོས་པ་ཡིན། དེས་ན་སླར་ཡང་སྨྲ་བརྗོད་རང་དབང་ནི་སྨྲ་པ་པོས་གང་བཤད་འདོད་པ་དེ་བཤད་ཆོག་པར་བབས་པ་ཡིན།

མི་གཞི་ལ་མཚང་འབྲུ་བྱེད་པ་ཙམ་ལ་དམིགས་ནས་གང་བཤད་པ་ནི་མི་འོས་པར་བརྩི་ཆོག འོན་ཀྱང་དེ་ཡང་སྨྲ་བ་པོ་རང་ངོས་ཐག་གཅོད་དགོས་པ་ལས་གང་ཟག་གཞན་ཞིག་གིས་ཁྱོད་ཀྱིས་འདི་ལ་དམིགས་ཡུལ་འདི་གཅིག་ལས་མི་འདུག་ཅེས་བརྗོད་དུ་མི་སྲིད་མིན་ཡང་བརྗོད་དཀའ་བ་ཡིན། རྒྱུ་མཚན་འདི་གཞིགས་པའི་ཚེ་ན་ཡང་སྨྲ་བརྗོད་རང་དབང་ནི་སྨྲ་པ་པོས་གང་བཤད་འདོད་པ་དེ་བཤད་ཆོག་པར་བབས་པ་ཡིན།

གཞན་ཡང་སྨྲ་བ་པོས་དོན་དག་དང་གནད་དོན་གཞན་ཞིག་བརྗོད་ཆེད་དུ་དམིགས་ནས་བརྗོད་བྱེད་ཀྱི་ཚིག་ལ་སྐྱེ་བོ་བྱེ་བྲག་ཅི་ལ་མཚང་འབྲུ་བའི་ཚིག་བེད་སྤྱོད་བྱེད་པ་ཡོང་ཆོག མ་གཞི་བརྗོད་ཐབས་དེ་འདྲ་སྨྲ་བ་པོ་བརྗོད་མི་མཁས་པར་བརྩི་ལོས་ཆོག་མོད་དོན་དག་གཞན་ཞིག་བརྗོད་པའི་ཆེད་དུ་སྐྱེ་བོ་བྱེ་བྲག་པ་ཞིག་ལ་མཚང་འབྲུའི་ཚིག་བྱུང་བ་ཡང་སྨྲ་བརྗོད་རང་དབང་གི་ཁོངས་སུ་གཏོགས་དགོས། ལར་ན་སྨྲ་བ་པོས་རང་གིས་གང་བཤད་པའི་མཇག་འབྲས་རང་གི་འགན་ཁུར་དགོས་པ་ལས་སུ་གཅིག་གི་ཁུར་མི་ཐུབ་ཅིང་། ལྷག་པར་དུ་གནས་སྐབས་འདི་འདྲའི་སྐབས་སུ་ལྷག་པར་འགན་ཡོངས་རྫོིགས་སྨྲ་པ་པོ་རང་ཉིད་ཀྱིས་ཁུར་དགོས། དེས་ན་འདི་ལ་བསམ་ན་ཡང་སྨྲ་བརྗོད་རང་དབང་ནི་སྨྲ་པ་པོས་གང་བཤད་འདོད་པ་དེ་བཤད་ཆོག་པར་བབས་པ་ཡིན།

ཐབས་ལམ།  མི་གཞི་ལ་མཚང་འབྲུ་རུ་འགྲོ་མི་འགྲོ་ནི་དེ་ལྟར་གང་ཟག་གི་འདུ་ཤེས་འཛིན་སྟངས་ལ་གྱུར་ཡོད་པས་གཞན་ཞིག་གིས་ཁ་ཚོན་གཅོད་དཀའ་བ་ཡིན། ཡིན་ན་ཡང་སྟབས་ལེགས་པ་ཞིག་ལ་དེ་ལ་དབྱེ་མཚམས་འབྱེད་བྱེད་ཀྱི་ཐབས་ཤེས་ཤིག་ཡེ་ནས་མེད་པ་མིན། དེ་ནི་སྐྱེ་བོ་ཞིག་གི་བྱ་བ་ལ་སྐྱོན་བརྗོད་བྱས་པ་དང་སྐྱེ་བོ་དེའི་མི་གཞི་ལ་སྐྱོན་བརྗོད་བྱེད་པ་གཉིས་ཀྱི་ཁྱད་པར་འབྱེད་པ་དེ་ཡིན། དེ་ནི་འདིའི་སྐབས་སུ་ཕན་ཐོགས་ཧ་ཅང་ཆེ་བར་མཐོང་། དཔེར་ནཿ “ཁྱོད་ཀྱིས་འདི་ལྟར་བྱེད་པ་ནི་ཁྱོད་བླུན་པོ་ཡིན་པའི་རྟགས་རེད།” ཅེས་ན་མི་གཞི་ལ་མཚང་འབྲུ་རུ་འགྱུར་བས་སྨྲ་རང་དབང་གིས་སྲུང་སྐྱོབ་ཏུ་ཚུད་མེད་པ་དང་། “ཁྱོད་ཀྱིས་འདི་ལྟར་བྱེད་པ་ནི་བླུན་པོའི་བྱེད་སྟངས་སུ་འགྲོ།” ཞེས་བརྗོད་ན་མི་གཞི་ལ་མཚང་འབྲུར་མི་འགྱུར་བས་སྨྲ་བརྗོད་རང་དབང་གི་ལྕགས་རིའི་ནང་དུ་ཚུད་ཡོད། འདི་ཡང་བཤད་མི་ཆོག་པར་བརྗོད་ན་སྨྲ་བརྗོད་རང་དབང་ལ་ཐོ་འཚམས་པ་ཡིན། ད་དུང་འདིར་གོ་བརྡ་འཕྲོད་ཆེད་དངོས་བྱུང་གི་དཔེར་མཚོན་གྱིས་ཞུ་རྒྱུར་། ཉེ་ཆར་རྡ་ས་མདོ་སྨད་ལས་ཁུངས་ཀྱིས་ཞུ་ཡིག་ཅེས་པ་དེ་ལས་དུམ་བུ་འགའ་ཞིག་དྲངས་ནས་ཞུ་ནཿ “སྤྱིར་ན་ཀླུ་མཁར་བྱམས་འདི་བ་བོད་ནང་གཞི་རིམ་སློབ་གྲྭའི་ཤེས་ཚད་ལས་མེད་པའི་མི་ཞིག་ཡིན་པ་དང་་་ཞེས་པ་ནས་་་་བརྡ་མི་འཕྲོད་པ་ཞིག་ཡིན་རབས་ཀུན་ལ་གྲགས་ཤིང་།” ཞེས་པ་ནི་སྐབས་དོན་འབྲེལ་མེད་མི་གཞི་ལ་མཚང་འབྲུ་ཁོ་ན་ཡིན། དེ་ནས་“འོ་ན་ཀླུ་མཁར་བྱམས་ཀྱིས་ཉི་མ་ཁ་དཀར་ངོ་དཀར་ལ་འདི་ལྟར་་་་ཞེས་པ་ནས་་་ཡོང་མིན་དོགས་པ་ངང་གིས་འཆར་ཞིང་།”ཞེས་པའི་བར་ནི་སྐྱོན་རྗོད་ལས་མཚང་འདྲུ་མིན། དེའི་མཇུག་དེ་མ་ཐག་ཏུ་ “མཚམས་ཚིགས་མེད་པར་ཕུ་དཀྲུགས་མདའ་དཀྲོགས་དང་། དགྲ་དགའ་གཉེན་སྡུག་གི་བྱ་བར་ཡ་ང་བག་ཚ་གཏན་ནས་མེད་པའི་མི་འདི་རིགས་”་ཞེས་པ་ནི་མི་གཞི་ལ་དམའ་འབེབས་ཡིན།

གནད་འགག   གནད་འགག་བཤད་འོས་པ་གཞན་ཞིག་ནི་སྨྲ་བརྗོད་གང་ཞིག་གི་ཚིག་ཟིན་ལ་མི་གཞི་ལ་མཚང་འབྲུ་བྱས་མེད་ན་སྨྲ་བརྗོད་རང་དབང་གི་སྲུང་སྐྱོབ་འོག་ཏུ་ཚུད་ཡོད། གལ་སྲིད་རྩོམ་པ་པོ་ཞིག་གིས་སྐྱེ་བོ་གང་ཞིག་ལ་མཚང་འབྲུ་བྱེད་འདོད་ན་ཤུགས་བསྟན་དང་། མཉམ་ཉིད་ཀྱི་རྒྱན། ཏིང་འཛིན་གྱི་རྒྱན་སོགས་ཀྱི་སྙན་ངག་གི་ངག་རྩལ་སྤྱད་ནས་བྱོས་དང་ཁྱོད་ལ་མི་གཞི་ལ་མཚང་འབྲུ་བྱས་པའི་སྐྱོན་མི་ཚུགས་པ་ཡིན། 

དེས་ན་སྤྱི་ཚོགས་གང་ཞིག་ལ་སྨྲ་བརྗོད་རང་དབང་ཡོད་ན་སྨྲ་བརྗོད་རང་དབང་དང་འགལ་བ་ཡང་མང་དུ་འབྱུང་ངེས་ཡིན་པར་རང་བཞིན་གྱིས་གྲུབ། ཡིན་ན་ཡང་དེ་ནི་སྨྲ་བརྗོད་རང་དབང་འགོགས་ཆོག་པའི་ཆ་རྐྱེན་དུ་གཏན་ནས་མི་འགྲོ། གཞུང་ལམ་གྱི་ཐོག་ཏུ་འཁོར་ལོ་བརྡབ་སྐྱོན་དེ་ཙམ་འབྱུང་ཡང་དེ་གཞུང་ལམ་བཟོ་མི་འོས་པའི་རྒྱུ་མཚན་དུ་འགྲོ་འམ། དེས་ན་སྨྲ་བརྗོད་རང་དབང་ཡོད་པ་དང་སྨྲ་བརྗོད་རང་དབང་ལ་འགལ་རྒྱུ་ཡོད་པ་གཉིས་ནི་སྒོར་གཅིག་གི་ངོས་གཉིས་དང་མཚུངས་པས་གཅིག་ཤོས་བླང་ནས་གཅིག་ཤོས་དོར་བའི་ཐབས་ཤེས་ཤིག་མེད། དེས་ན་སྨྲ་བརྗོད་རང་དབང་དང་འགལ་རྒྱུ་ཡོད་པ་དེ་དགེ་རྟགས་ཤིག་གམ་སྤོབས་པ་བྱ་འོས་པ་ཞིག་ལས་སེམས་ངལ་བྱེད་དགོས་མེད། དེ་དག་ནི་བདག་གིས་གོ་བའི་སྨྲ་བརྗོད་རང་དབང་གི་གོ་དོན་དང་དེའི་ཁྱབ་ཚད་རྣམས་ཡིན།

འདྲ་མཉམ། སྨྲ་བརྗོད་རང་དབང་ཞེས་བརྒྱ་བཤད་སྟོང་གི་མཐའ་མར་གོ་རྟོགས་རང་དབང་ཞེས་པ་ཞིག་ཀྱང་ལོས་ཡོད། རིག་ལམ་གྱི་རིགས་སྒྲེ་བཏང་ན་སྨྲ་བ་པོས་གང་བཤད་འདོད་པ་བཤད་ཆོག་ན་ཉན་པ་པོས་ཀྱང་གང་ལྟར་གོ་བ་ལེན་ན་ལེན་ཆོག་པའི་ཐོབ་ཐང་འདྲ་མཉམ་དུ་ཡོད་དགོས་པར་འདོད། དེ་བཞིན་སྨྲ་བ་པོས་ཁ་ནས་གང་བཤད་ན་ཆོག་པ་བཞིན་ཉན་པ་པོས་ཚིག་གང་ཞིག་ཁུར་ནས་སྨྲ་པ་བོ་ཁྲིམས་ལ་གཏུགས་རུང་ཆོག་པ་རེད། དེའི་ཕྱིར་སྨྲ་བ་པོ་ཚོས་རང་ཉིད་ཀྱི་སྐད་ཆའི་ཚིག་སྣ་གང་ཞིག་ལ་འཇུས་ནས་སྐྱེ་བོ་སུ་ཞིག་གིས་རང་ཉིད་ཁྲིམས་ལ་སྦྱར་རུང་དེའི་སྐབས་སུ་དེ་ལ་ལན་དོན་མཐུན་འདེབས་རྒྱུ་ཡོད་པའམ་ཡང་ན་ཁྲིམས་ཐོག་ནས་རང་ཉིད་ལ་ནག་ཅན་དུ་ཐག་བཅད་རུང་འགྱོད་པ་མེད་པའི་གྲ་སྒྲིག་གཉིས་ཀ་སྔོན་ནས་བྱས་ཡོད་ངེས་ལ་དེ་བྱེད་དགོས་པའང་ཡིན། སྨྲ་བ་པོས་ “ཚེ་རིང་གིས་མི་འཇོན།”་ཞེས་སྨྲ་ན་ཉན་པ་པོ་རྡོ་རྗེས་ཁོ་ལ་བརྙེས་དམོད་བྱས་སོང་བར་གོ་ལེན་ཀྱང་ཆོག འདི་ནས་གོ་བ་བླངས་པ་དེ་དོན་ལ་གནས་མིན་གྱི་རྩོད་པ་དེ་གཞི་ནས་མགོ་ཚུགས་པ་ཡིན། དེའི་རྗེས་སུ་བདེན་དང་ལུང་པ་ཕུ་ཐག་རིང་། །བརྫུན་དང་ཨ་བྲ་རྔ་མ་ཐུང་། ཞེས་ཟེར་བའི་གཏམ་དཔེ་དེའི་གནས་ལུགས་མངོན་པར་འགྱུར། བདེན་བརྫུན་ཤན་འབྱེད་ཀྱིས་གྲོས་གླེང་གི་མཐར་གོ་བ་བླངས་ནོར་བའམ་སྨྲ་མཁན་ནོར་བ་ལྷང་ལ་འབུད་ངེས་རེད།

ཉེས་ཆད། སྨྲ་པ་པོས་སྐྱེས་བོ་ཞིག་གཞི་མེད་ཀྱི་སྙོན་འཛུགས་བྱེད་ན་སྨྲ་བརྗོད་རང་དབང་གི་ནང་དུ་ཚུད་ཡོད་ལ་ཉན་པ་པོ་ལ་ཡང་ཁུངས་འཚོལ་བའི་ཐོབ་ཐང་གཅིག་མཚུངས་སུ་ཡོད། གཞི་མེད་ཀྱི་སྙོན་འཛུགས་ཤིག་གིས་སྐྱེ་བོ་ཞིག་གི་མིང་མཐོང་ལ་གནོད་པ་བྱུང་ཡོད་ན་སྐྱེས་བོ་དེ་ལ་སྨྲ་བ་པོས་བཤད་པའི་སྐད་ཆ་ལ་ཁུངས་སྐྱེལ་དགོས་པ་པའི་དགོས་འདུན་འདོན་པའི་ཐོབ་ཐང་ཡོད་པ་མ་ཟད། ཁུངས་མེད་ན་ཇི་ལྟར་མཚན་དམད་བྱས་པ་དེ་ལྟར་དུ་དག་འབུད་བྱེད་དགོས་པའི་འགན་ཡོངས་རྫོགས་སྨྲ་པ་པོ་ལ་ཡོད། སྨྲ་བ་པོ་ཞིག་གིས་ཁུངས་མེད་པའི་གཏམ་འཆལ་གང་བྱུང་སྨྲ་བ་ལ་ཉན་པ་པོས་ཁུངས་སྐྱེལ་དགོས་པར་བརྗོད་ན་ངེས་པར་དུ་ཡང་ན་ཁུངས་སྐྱེལ་དགོས་ཤིང་། དེ་མེད་ན་མེད་པའི་ཁྱབ་བསྒྲགས་ཉན་པ་པོའི་བློ་མ་ཚིམས་པར་དུ་བྱེད་དགོས། དེ་ནི་སྨྲ་བརྗོད་རང་དབང་བེད་ལོག་ཏུ་བཏང་བའི་ཉེས་ཆད་གཅིག་རང་འགེལ་རྒྱུ་ཡོད་པ་དེ་རེད།  
སྐྱོན་བརྗོད།  ད་ནི་དོན་དག་གལ་ཆེན་གཞན་ཞིག་ནི་སྐྱོན་བརྗོད་བྱེད་པ་དེ་རེད། དམངས་གཙོའི་སྤྱི་ཚོགས་ཀྱི་ནང་དུ་སྤྱིར་བཏང་དང་ལྷག་པར་དུ་སྲིད་གཞུང་ལ་སྐྱོན་བརྗོད་བྱེད་པ་ནི་ཐོབ་ཐང་ཡིན། གཞུང་ལ་སྐྱོན་བྱེད་པ་དེ་གཞུང་ལ་བརྩི་བཀུར་མི་བྱེད་པར་བརྩི་བ་ནི་སྐྱོན་བརྗོད་ཀྱི་གོ་དོན་དང་དམངས་གཙོའི་གོ་རྟོགས་ན་མ་སྨིན་པའི་རྟགས་མཚན་ཡིན། སྐྱོན་བརྗོད་བྱེད་པ་ནི་རེ་བ་ཞིག་བཟུང་ནས་བྱེད་པ་ཡིན། བརྩི་བཀུར་བྱེད་མི་དགོས་པའི་གཞུང་ལ་སུས་སྐྱོན་བརྗོད་བྱེད། ང་ཚོའི་སྲོལ་རྒྱུན་དང་ལྷག་པར་དབུས་ཕྱོགས་སུ་གཞན་ལ་སྐྱོན་བརྗོད་བྱེད་པ་ནི་མི་ལེགས་པའི་ཕྱོགས་སུ་བརྩི་བ་ཡིན། འདི་ནི་སྐྱོན་བརྗོད་དང་མཚང་འབྲུ་གཉིས་སོ་སོར་མ་ཁོལ་བ་ཙམ་དུ་སྣང་། གཉིས་ནས་གཞན་ལ་སྐྱོན་གང་བཙུགས་པ་དེ་རང་ལ་སྐྱོན་དེ་ཡོད་པའི་ཚོར་སྣང་ཡོད་སྟབས་མིའི་མདུན་དུ་རང་ཉིད་སྐྱོན་ཅན་དུ་བཟོ་བར་སུས་འདོད། དེ་འདྲའི་གནས་བབས་ཀྱི་འོག་ཏུ་ལུགས་སྲོལ་དེ་འདྲ་ཞིག་དར་བ་ཡིན་ན་ཡང་ད་ནི་ལུགས་སྲོལ་དེ་དུས་རབས་དང་བསྟུན་ནས་སྒྱུར་དགོས་པར་སྣང་།

སྐྱོན་བརྗོད་ནི་ལེགས་ཉེས་གཉིས་ལས་ལེགས་པ། དཀར་ནག་གཉིས་སུ་ཕྱེ་བའི་དཀར་པོ། བཟང་ངན་གཉིས་སུ་ཕྱེ་བའི་བཟང་པོ། ཕན་གནོད་གཉིས་སུ་ཕྱེ་བའི་ཕན་པ་བཅས་ཡིན། དེ་ལས་ལྡོག་སྟེ་སྐྱོན་ལ་སྐྱོན་དུ་མ་བརྗོད་ན་འགན་མ་ཁུར་བའི་ཇོ་བཟང་གི་བྱ་བར་གྱུར་བ་ཡང་ཡིན། མི་ལ་བལྟ་བའི་མིག་ཡོད་ཀྱང་། རང་ལ་བལྟ་བའི་མེ་ལོང་དགོས། ཞེས་པ་ལྟར་རང་གི་གདོང་པ་ནི་མེ་ལོང་ལ་མ་བརྟེན་པར་མི་མཐོང་བ་བཞིན་རང་གི་སྐྱོན་ནི་གཞན་གྱིས་མ་བརྗོད་པར་མི་མཐོང་། དེས་ན་སུ་ཞིག་གིས་རང་གི་སྐྱོན་བཏོན་པ་ནི་རང་ལ་གནོད་པའི་ལས་བྱས་པ་མིན་པར་ཕན་པའི་ལས་བྱས་པ་ཡིན། དེས་ན་སྐྱོན་བརྗོད་ནི་རང་གི་དྲི་མ་དག་པའི་དག་རྫས་ལྟར་དུ་མཐོང་དགོས། སྐྱོན་བརྗོད་ནི་རང་གི་ཉེས་བྱས་ངོས་འཕྲོད་པའི་ལམ་སྟོན་དུ་མཐོང་དགོས། སྐྱོན་བརྗོད་ནི་ཡོན་ཏན་ལ་འདེད་པའི་སྐུལ་ལྕགས་སུ་མཐོང་དགོས།  

བསམ་དགོས་པ། བསམ་དགོས་པ་གཞན་ཞིག་ཡོད་པ་ནིཿ དམངས་གཙོའི་སྤྱི་ཚོགས་ཀྱི་ནང་དུ་སྤྱི་དོན་གྱི་ཆེད་དུ་སྐྱོན་བརྗོད་བྱེད་པ་འོས་བབས་ཡོད་ཚུལ་བཤད་པ་གོ་བ་ལོན་ཆོག་ཆོག་ཡོད་ན་ཡང་། རང་དོན་གྱི་ཆེད་དུ་སྐྱོན་བརྗོད་བྱེད་ན་འོས་བབས་ཡོད་དམ། ངས་ནི་དྲི་བ་འདི་ལ་ཡང་ལན་ཐད་དཀར་མི་ཕོགས། གང་ལགས་ཤེ་ན་རང་ཞེས་པ་དེ་ཡང་སྲིད་གཞུང་དེའི་འབངས་མི་ཡིན་ཞིང་། འབངས་མི་ཡོངས་ཀྱི་འདོད་པ་སྒྲུབ་ཐུབ་པ་ནི་སྲིད་གཞུང་གི་ལས་འགན་ཁོ་ན་དེ་རེད། འདིར་ཟམ་གདོང་རིན་པོ་ཆེའི་བཞེད་པ་སྟེ། དམངས་གཙོ་ལས་མང་གཙོར་བཅོས་པའི་གོ་བ་དེ་བླངས་ན་ནི་མི་གཅིག་ཕར་ཞོགས། གྲངས་མང་ན་ཡང་ཉུང་བའི་ཕྱོགས་ཡིན་ན་དེ་དག་གི་འདོད་པ་རྡོག་རོལ་དུ་གཏོང་ཆོག་པའི་གོ་བ་ཡིན། འོན་ཀྱང་དམངས་གཙོའི་གོ་བ་དངོས་ཀྱི་ནང་དུ་དེ་འདྲ་གང་ཡང་མེད། རང་དོན་ཁོ་ན་ཁོག་ཏུ་བཅུག་པའི་སྐྱོན་བརྗོད་ཡིན་ན་མི་འོས་པར་བཤད་གཏུབ་རུང་། གྲངས་གཅིག་ལས་མེད་པས་དེའི་འདོད་པར་བསྟུན་མི་དགོས་པའི་བཤད་ཚུལ་དེ་ནི་དམངས་གཙོའི་གོ་བ་དང་འགལ་བར་ཡེ་ནས་བརྗོད་མི་ཐུབ། མཚང་འབྱིན་དང་སྐྱོན་འབྱིན་ལོགས་སུ་ཁོལ་ན་སྨྲ་བརྗོད་རང་དབང་ངོས་ཟིན་པའི་རྟགས་དང་། གྲངས་མང་ཉུང་མི་གཙོ་བར་གནད་ཆེ་ཆུང་གཙོ་བ་ངོས་ཟིན་ན་གཞི་ནས་དམངས་གཙོ་ཡང་དག་པར་ངོས་འཕྲོད་པའི་རྟགས་སུ་ཁོ་བོས་བསམ།

མདོར་ན། མདོར་ན་སྨྲ་བརྗོད་གང་ཞིག་སྨྲ་བརྗོད་རང་དབང་གི་ཁྱབ་ཁོངས་སུ་འགྲོ་མི་འགྲོའི་རྩོད་པ་འདི་ནི་སྨྲ་བརྗོད་གང་དེས་གཞན་ལ་ཕོགས་ཐུག་འགྲོ་མི་འགྲོ་ལ་ཐུག་ཡོད། དེས་ན་ཕོགས་ཐུག་འགྲོ་མི་འགྲོ་ནི་ཉན་པ་པོའི་སྐྱོན་ཡོན་ལ་ཐུག་ཡོད་པ་ལས་སྨྲ་པ་པོ་ལ་ཐུག་པ་ཞིག་ཡེ་ནས་མིན། ཉན་མ་ཤེས་པའི་མི་ལ་དྲང་གཏམ་བཤད་རུང་ཕོགས་རྒྱུ་ཡིན་པ་དང་། དཀྱེལ་ཡངས་པའི་མི་ལ་གདོང་ལ་བལྟས་ནས་མཚང་བྲུས་རུང་ངར་མི་ཁོལ་བ་ཡིན། དེས་ན་སྨྲ་པ་པོས་བཤད་ཆོག་མི་ཆོག་དེ་ཉན་པ་པོས་གོ་བ་ཇི་ལྟར་ལེན་པ་ལ་འཇོག་པ་ནི་ཧ་ཅང་འུ་ཐུག་གི་བྱ་བ་དང་། སྨྲ་བརྗོད་རང་དབང་ལ་བརྡལ་བཤིག་ཚད་མེད་བཏང་པ་རང་ཡིན། ད་ལྟ་ཡོད་པའི་སྨྲ་བརྗོད་ཀྱི་ཚད་བཀག་འདི་འདྲ་ཞིག་འབྱུང་དོན་ཡང་སྨྲ་པ་པོ་མི་གཅིག་ལས་མེད་པ་དང་། ཉན་པ་པོ་མང་པོ་ཡོད་སྟབས་མང་བས་ཉུང་བ་རྡོལ་རོལ་གྱི་གནས་ཚུལ་ལས་བྱུང་བ་ཉག་ཅིག་ཡིན། དེ་མིན་གལ་སྲིད་སྨྲ་པ་པོ་གཅིག་ལ་ཉན་པ་པོ་གཅིག་ལས་མེད་ན་ཁྱོད་ཀྱིས་བཤད་པ་དེས་ང་ལ་ཕོགས་སོང་བས་དེ་བཤད་མི་ཆོག་ཅེས་འདོམས་འོས་སམ།

གནའ་མི་བོད་ཀྱི་གཏམ་དཔེ་ལཿ སྐྱེས་ཕོ་རབས་ཁོག་པ་ནམ་མཁའ་འདྲ། མདའ་རྒྱང་འཕེན་བྱས་ན་ཐུག་ལེ་མིན། ཕོ་འབྲིང་ཁོག་པ་གཞུང་ལམ་འདྲ། མཛོ་ཁྱུང་དཀར་ལྔ་བརྒྱ་ཤོང་ལེ་ཡིན། ཕོ་མཐའ་མའི་ཁོག་པ་ཁབ་མིག་འདྲ། ཤིག་ཅིག་གི་འགུལ་སྐྱོད་བྱེད་ས་མེད། ཅེས་པ་ཟེར་། སྤྱི་ཚོགས་ཧྲིལ་པོ་སྐྱེས་ཕོ་རབས་དེ་འདྲ་མང་ཤོས་སུ་གྱུར་ན་ད་གཟོད་ཚད་མཐོ་བའི་སྨྲ་བརྗོད་རང་དབང་དེ་འབྱུང་བ་ཡིན་ནོ། 

 རྩོམ་འདི་བྲིས་པའི་དགོས་པ།

ཁོ་བོའི་རྩོམ་འདི་འབྲི་བའི་དགོས་པ་དེ་མ་བཤད་ན་གོ་བརྡ་ཡག་པོ་ཞིག་འཕྲོད་ཀྱི་མེད་པ་ལྟར་མཐོང་། ངའི་རྩོམ་དེ་འབྲི་བའི་དགོས་པ་ནི་སྨྲ་བརྗོད་རང་དབང་བརྡལ་བཤིག་མ་བཏང་བའི་སྒོ་ནས་སྨྲ་བརྗོད་རང་དབང་བེད་སྤྱོད་ལོག་པར་གཏོང་བ་འགོག་ཆེད་དུ་བྲིས་པ་ཡིན། དེ་ཡང་གལ་སྲིད་འདི་དང་འདི་འདི་ལྟར་དང་དེ་ལྟར་བཤད་ཆོག་དང་མི་ཆོག་གི་ཁྲིམས་ལུགས་ཤིག་ནམ་ཞིག་བཅས་པ་ན་དེ་དུས་སྨྲ་བརྗོད་རང་དབང་རྡོག་རོལ་དུ་བཏང་བ་ཡིན། གང་ལགས་ཤེ་ན་སྨྲ་པ་པོ་ལ་ཕྱིའི་དབང་ཤུགས་ཀྱིས་རང་གི་གང་བཤད་འདོད་པ་བཤད་དབང་མེད་པར་བཏང་བ་རེད། དེ་འདྲའི་ཁྲིམས་ལུགས་ཤིག་བཟོས་ཚེ་གང་ཟག་གཉིས་པ་དང་གསུམ་པས་ཁྲིམས་ལུགས་དེ་འཁོར་པའི་ཁྲིམས་ཡིག་དེ་གནམ་ལ་འཕྱར་བཞིན་ཁྱོད་ཀྱིས་འདི་དང་དེ་འདི་ལྟར་དང་དེ་ལྟར་བཤད་མི་ཆོག་སྟེ། ཁྲིམས་ཡིག་འདི་དང་འདི་ལ་འགལ་འགྲོ་སོང་བས་སོ་ཞེས་བཤད་ཀྱི་རེད། དེ་འདྲ་ལ་སྨྲ་བརྗོད་རང་དབང་གི་བརྡལ་བཤིག་མི་ཟེར་ན་སྨྲ་བརྗོད་རང་དབང་གི་ས་མཚམས་ཡེ་ནས་མི་ལོན། དེའི་ཕྱིར་སྨྲ་བརྗོད་རང་དབང་ནི་སྨྲ་པ་པོས་གང་བཤད་འདོད་པ་བཤད་ཆོག་པར་གོ་དགོས་པར་བཤད་པ་ཡིན། སྨྲ་བརྗོད་ལ་ཚད་བཀག་མེད་ཡེ་ནས་བཤད་མེད་ཅིང་། ཚད་བཀག་ནི་སྨྲ་པ་པོ་ལས་གཞན་པའི་ངོས་ནས་ཡོང་མི་འོས་པར་བཤད་ཡོད།

དེས་ན་སྨྲ་བརྗོད་རང་དབང་ནི་གང་བཤད་བཤད་ལ་ཚད་བཀག་མེད་ཀྱང་ཚད་བཀག་ཡོད་ཅེས་འགལ་འདུའི་ཚིག་ཅིག་བརྗོད་དགོས་པ་འདྲ། དེ་མིན་ཀློག་པ་པོ་དག་གིས་གོ་བརྡ་འཕྲོད་དཀའ་བར་སྣང་། དེ་ཡང་གཞན་ངོས་ནས་གང་བཤད་བཤད་ཡིན་ལ་སྨྲ་པ་པོ་རང་ངོས་ནས་ཚད་བཀག་བྱེད་དགོས་ཞེས་པ་ལ་ཟེར་བ་ཡིན། སྨྲ་པ་པོས་གཞན་ས་ལ་རང་བསྡད་ནས་སྨྲ་བརྗོད་རང་དབང་ལ་ཚད་བཀག་བྱེད་དགོས་པ་ཡིན། དེ་ལྟར་བྱས་ན་སྨྲ་བརྗོད་རང་དབང་ལ་བརྡལ་མ་སོང་བའི་སྒོ་ནས་ཚད་བཀག་དེ་བྱས་པ་ཡིན། དེ་མིན་ཐབས་ཤེས་མེད། ཅི་སྟེ་སྨྲ་པ་པོས་དེ་ལྟར་རང་ངོས་ནས་ཚད་བཀག་མ་བྱས་ན་ཁོ་སྡུག་པ་ལ་ཨང་ཟེར་བ་ཙམ་ལས་ཐབས་ཤེས་གཞན་མེད། དེའི་ཕྱིར་འབྱུང་འགྱུར་གྱི་སྨྲ་པ་པོ་དག་གི་ཐུགས་རྒྱུད་ལ་སྨྲ་བརྗོད་རང་དབང་གི་ཚད་བཀག་དེ་བསྐྱེད་པའི་ཆེད་དུ་ཁོ་བོས་རྩོམ་དེ་བྲིས་པ་ཡིན། དེ་བྱུང་ན་སྨྲ་བརྗོད་ལ་འདི་དང་དེ་བརྗོད་འོས་དང་མི་འོས་ཀྱི་ཁྲིམས་བཅའ་མི་དགོས་པར་སྨྲ་པ་པོ་རང་ངོས་ནས་འགན་ཁུར་འོང་བའི་ཁོ་བོས་རེ་ལྟོས་འཆང་གི་ཡོད་དོ།