ཐེག་དཀའ་བའི་ལྗིད།

ཟླ་བ་གཅིག་ལྷག་ཙམ་ཚུན་ཆད་ནས་གློ་བུར་གྱི་རྐྱེན་ཞིག་གིས་དབང་གིས་ཁོ་བོས་བོད་ཀྱི་རྩ་དོན་ལ་རང་འཁྲིའི་འགན་ཞིག་བླངས་ཁུལ་གྱིས་རང་ཚོད་ཀྱི་ཐུབ་ཚོད་ཅིག་བློས་བཏང་ནས་དབུ་མའི་ལམ་གྱི་སྐོར་ལ་རང་ལ་ཡོད་པའི་སེམས་ཁྲལ་རྣམས་སྤྱི་བསྒྲགས་བྱེད་བཞིན་ཡོད། འོན་ཀྱང་རང་རེའི་བསམ་ཡོད་དུ་གྲགས་པའི་གནད་ཡོད་མི་སྣ་རེ་ཟུང་གིས་གཙོས་པའི་མང་ཆེ་བས་དབུ་མའི་ལམ་ལ་དྲི་བ་བྱེད་པ་དང་༧རྒྱལ་བ་རིན་པོ་ཆེ་ལ་དགག་པ་བྱེད་པ་གཉིས་ངོ་བོ་གཅིག་བསྲེས་ནས་མགོ་བོ་གནོན་ཐབས་བྱེད་པ་དང་། ལྷག་པར་དུ་ཟམ་གདོང་རིན་པོ་ཆེས་“་་་རང་བཙན་རྩོད་མཁན་རྣམས་ནི་རྒྱ་མི་ལས་ཉེན་ཁ་ཆེ་བ་ཡིན་་་”་གསུང་པ་སོགས་ཀྱིས་རང་རེའི་སྤྱི་ཚོགས་ཀྱི་གནོན་ཤུགས་འདི་འདྲའི་ནང་དུ་ང་ལྟ་བུའི་བློ་ཆུང་རྣམས་རང་གི་བསམ་འཆར་སྲོང་བོར་བཤད་ན་མགོ་བོ་དགྱེ་དཀའ་མོར་སྣང་། བག་ཡངས་ཀྱིས་འཚོ་མཁན་རྣམས་ནི་མགོ་བདེ་དྲན་འཕྲུལ་སྐབས་འཚོལ་རིང་ལུགས་པ་རྣམས་རེད།

ཉེ་ཆར་བཀའ་ཁྲི་རང་གི་ངག་ནས་རང་རེའི་སྤྱི་ཚོགས་ནང་དུ་དམངས་གཙོའི་གནས་ཚད་མཐོ་བའི་རྩེ་མོར་སླེབས་ཡོད་ཚུལ་རྒྱང་སྒྲོག་བྱས་ན་ཡང་། ཁོང་རང་གིས་གསུངས་ལས་རང་རེའི་དམངས་གཙོའི་གནས་ཚད་ནི་ད་དུང་བྱིས་པ་ལོ་གཉིས་ཅན་ལྟ་བུ་ཞིག་ཏུ་གནས་ཡོད་པར་སྟོན་གྱི་འདུག དམངས་གཙོ་དང་རང་དབང་ཇི་ཙམ་བཤད་རུང་མ་བཤད་རུང་གོང་གི་དབུ་ཁྲིད་ལ་དཀྱེལ་ཡངས་མེད་ན་སྨྲ་བརྗོད་རང་དབང་ལ་དཀའ་ངལ་འདི་འདྲ་འཕྲད་རྒྱུ་ཡིན། ཁྲིམས་དང་སྒྲིག་གཞིའི་ནང་དུ་ཇི་ཙམ་སྙན་པོ་བྲིས་ཡོད་ཀྱང་གཙོ་བོ་དེ་ཉམས་ལེན་བྱེད་པ་པོས་མཉམ་ལེན་མ་བྱས་ན་དེ་ལ་རིན་ཐང་གང་ཡང་ཡོད་པ་མ་རེད། དཔེར་མཚོན་ནི་ཕར་ཕྱོགས་སུ་རྒྱ་ནག་ལ་བལྟོས་དང་གསལ་བོར་ར་འཕྲོད་ཐུབ་པར་འདུག

ཁྲིམས་དང་སྒྲིག་གཞིས་སྨྲ་བརྗོད་རང་དབང་བཀག་ན་དམངས་གཙོའི་སྤྱི་ཚོགས་ཤིག་གི་ནང་དུ་ཐེར་འདོན་བྱེད་པ་ལས་སླ་བོ་ཞིག་ཏུ་གྱུར་ཡོད་ན་ཡང་། སྤྱི་ཚོགས་དུམ་བགོས་བྱས་ནས་སྤྱི་ཚོགས་ཀྱི་གནོན་ཤུགས་སྤུངས་ནས་སྨྲ་བརྗོད་རང་དབང་བཀག་ན་རྙོག་དྲའི་འདུ་འཛིང་ཧ་ཅང་ཆེན་པོ་རེད། ཟམ་གདོང་རིན་པོ་ཆེ་ལྟ་བུ་མཁས་པ་དང་། གནད་ཡོད། གཞུང་གི་གོ་གནས་ཅན། བླ་མ་ཞིག་གིས་བཀའ་མོལ་འདི་འདྲ་གནང་ན་བོད་ཀྱི་སྤྱི་ཚོགས་དུམ་བགོས་བྱེད་པའི་རྒྱུ་རྐྱེན་གཙོ་བོ་ཞིག་ཏུ་འགྱུར་། དེའི་ཕྱིར་མཁས་པ་ཞིག་གིས་གང་ཞིག་སྤྱི་ཚོགས་ཐོག་གསུང་འོས་པ་དང་གང་ཞིག་མི་འོས་པའི་དབྱེ་བ་དེ་མཁྱེན་དགོས་ཚོད་ལ་དེ་ལྟར་མ་མཁྱེན་པ་ཁོ་བོར་ཧ་ཅང་ཡ་མཚན་སྐྱེས། ཡང་ན་ཁོང་ལ་ཆབ་སྲིད་ཀྱི་དམིགས་ཡུལ་གཞན་ཡོད་ན་ནི་ཡ་མཚན་དགོས་དོན་གང་ཡང་མི་འདུག མི་ཕལ་བ་ཞིག་གི་སྤྱོད་པར་ཡ་མཚན་བྱེད་ན་རང་ཉིད་ནོར་བ་རེད། ངས་ད་དུང་ཡང་ཁོང་སྐྱེས་བོ་ཕལ་བ་ཞིག་མིན་པའི་ཡིད་ཆས་ཨུ་ཚུགས་ཀྱིས་ཉར་ཡོད།

༧སྐྱབ་མགོན་རིན་པོ་ཆེའི་གསུང་གི་ཆ་ཤས་གཅིག་ལ་མོས་མཐུན་མེད་པ་དང་། ༧སྐྱབས་མགོན་རིན་པོ་ཆེ་གང་ཟག་རང་ལ་གུས་བརྩི་མི་བྱེད་པ་གཉིས་ཉ་ཉོག་མ་བསྲེས་པར་སོ་སོར་ངེས་པར་དུ་འབྱེད་ཤེས་དགོས་ཀྱི་འདུག དེ་མ་བྱས་ན་ངོ་མ་འདི་ལྟར་གནོན་ཤུགས་སྤྲོད་མཁན་རྣམས་རྒྱ་མི་ལས་ཉེན་ཁ་ཆེ་བ་འདུག མོས་མཐུན་མེད་པ་དང་དགག་པ་བྱེད་པ་སོ་སོ་ཡིན་ལ། དགག་པ་བྱེད་པ་དང་དམའ་འབེབས་བྱེད་པ་ནི་དེ་བས་ཐ་དད་ཡིན། ལྟ་བས་མོས་མཐུན་མེད་ཀྱང་སྤྱོད་པས་རྒྱབ་སྐྱོར་བྱེད་པ་ཡང་དམིགས་བསལ་གྱི་གནས་སྟངས་འོག་མི་འགལ།

དབུ་མའི་ལམ་པ་བ་ཡ་རབས་འགའ་ཞིག་གིས་༧སྐྱབས་མགོན་རིན་པོ་ཆེས་ཇི་གསུང་བཀའ་དང་ལེན་བྱེད་པ་ནི་རང་རེའི་སྟོབས་ཤུགས་ཡིན། རྒྱ་ནག་གིས་ཏཱ་ལའི་བླ་མས་བོད་ཀྱི་ཚབ་མཚོན་མི་ཐུབ་ཅེས་ཟེར་བ་ལ་ལན་ཚ་བོ་ཞིག་ཡིན་པར་གསུངས། འདི་ལ་མོས་མཐུན་ལོས་ཡོད། འོན་ཀྱང་༧སྐྱབས་མགོན་རིན་པོ་ཆེས་བཀའ་ཇི་གསུང་ལ་བོད་མི་ཡོངས་རྫོགས་ཤར་སྐྱོད་བྱེད་པ་ཡིན་ཀྱང་། རང་བཙན་གྱི་གནད་དོན་ལ་ཐུག་ན་༧སྐྱབས་མགོན་རིན་པོ་ཆེའི་གསུང་ལ་ཡང་མོས་མཐུན་མི་བྱེད་པའི་བརྡ་འདིས་རང་རེའི་སྟོབས་ཤུགས་དེ་ལས་ཆེ་བ་ཞིག་ཡིན་སྙམ། དེ་ནི་རྒྱ་ནག་གིས་ཏཱ་ལའི་བླ་མ་མེད་པའི་ཉིན་མོ་ནས་བོད་དོན་མེད་པར་འགྱུར་ངེས་ཀྱི་ལོག་རྩིས་དེ་ལ་ལན་ཚ་བོ་ཞིག་མིན་ནམ་སྙམ།

༧སྐྱབས་མགོན་རིན་པོ་ཆེའི་གསུང་བྱེ་བྲག་ཅིག་ལ་དོགས་སློང་བྱས་པ་དེ་༧སྐྱབས་མགོན་རིན་པོ་ཆེ་ལ་“དམའ་འབེབས་བྱས་པ”རེད་ཅེས་གནད་ཡོད་མི་སྣས་སྤྱི་ཚོགས་ཐོག་བློ་ཡུལ་ན་མེད་པའི་བརྙོན་འཛུགས་སྤྱི་བསྒྲགས་བྱས་ན་དེའི་ཉེར་འབྲས་སུས་ཁུར་ཐུབ། འདི་འདྲ་བའི་ཉ་ཉོག་བསྲེས་ནས་སྤྱི་ཚོགས་ཐོག་གླེང་ཕྱོགས་བཟོ་བ་ནི་རྗེས་ལུས་ཀྱི་རྣམ་པ་ཞིག་ཡིན་པ་དེ་སྔོན་བྱུང་བའི་ཕྱི་ནང་གི་ལོ་རྒྱུས་ཀྱི་དུམ་ཚན་མང་པོའི་ནང་དུ་མཐོང་རྒྱུ་ཡོད།

དཔེར་ནཿ ནུབ་ཕྱོགས་པའི་ལྟ་གྲུབ་སྨྲ་བའི་མྱེས་པོར་གྲགས་པ་སོ་ཁིརིཊ་ལ་ལུགས་མཐུན་པའི་ལམ་དུ་ཞུགས་པ་དང་གཞོན་པ་ལོག་ལམ་དུ་ཁྲིད་པའི་ཉེས་པ་བཀལ་ནས་སྲོག་ཁྲིམས་བཅད། བཀའ་བློན་ལུང་ཤར་ལ་སྐུ་འདུན་ལ་ངོ་ལོག་བྱས་པར་བསྙད་ནས་མིག་རིལ་བཏོན། དགེ་འདུན་ཆོས་འཕེལ་སོ་ཉུལ་གྱི་ཉེས་མིང་བཏག་ནས་ཁྲི་མོན་དུ་བཅུག་ནས་མཐར་སྐུ་སྲོག་ཀྱང་མ་འཚོ་བར་བྱས། འདི་ལ་སོགས་པའི་གནས་ཚུལ་བགྲང་གིས་ལ་ལངས།