ཀ་ཡིག་གྱེན་ལ་བསླངས་འདྲའི་གྲོང་ཁྱེར་དུ།
ཁ་ཤ་ཐ་མག་མེ་ཡིས་འཚིག་ཞོར་དུ།
ག་ཅན་གནག་རྫི་ཆ་བོའི་ཁ་ཐད་དུ།
ང་རྒྱལ་ངོམ་སོ་བྱེད་པ་ཐེངས་མ་དུ།
ཅ་རིལ་དབྱིབས་ལ་འགྲན་པའི་དབུ་རིལ་ནས།
ཆ་མེད་སྐྲ་སེར་ཡུལ་ལ་ཁ་བསྲིང་ནས།
ཇ་ཟས་ཟ་བའི་ཁོམས་ཀྱང་མི་སྟེར་ནས།
ཉ་ཁུག་གུག་ནས་སྡོད་པ་ཉོ་བཞིན་གནས།
ཏ་ལའི་དྲུང་དུ་ཉེ་བར་བཅར་ན་ཡང་།
ཐ་མལ་བོན་ལ་བྱིན་རླབས་བྲན་ན་ཡང་།
ད་དུང་དད་པའི་ཨ་ལོང་མ་ཡོད་ན།
ན་མོ་བླ་མའི་ལྕགས་དཀྱུས་ཨེ་ཟིན་ན།
པ་རྒན་ཞིག་གི་ལས་འགན་ཁུར་ནས་སུ།
ཕ་མར་དྲིན་ལན་ལོག་འཇལ་མཁན་སྐྱེ་བོ་སུ།
བ་ཕྱུགས་མིན་ན་མ་ཧེའི་ཆ་ལུགས་སུ།
མ་ལུས་གཅིག་ཏུ་བརྙེས་པའི་ཧམ་ཅན་སུ།
ཙ་གེ་ཙི་གེ་བྲིས་ནས་ང་རྒྱལ་ཅན།
ཚ་བའི་ལུང་པར་ལུས་པའི་རྗེས་ལུས་ཅན།
ཛ་རེ་ཛོ་རེ་བྱེད་པའི་ལས་ངན་ཅན།
ཝ་ལེར་ཀླད་པའི་ནང་དུ་འཆར་རྒྱུ་ཅན།
ཞ་ལུགས་གོམ་སྟབས་བརྗེས་ནས་ད་ལྟའི་བར།
ཟ་ཁང་ཆང་ཁང་ནས་བཟུང་གཞང་ཁང་བར།
འ་འུར་འདི་འཛི་སྤོང་བར་མི་ཡོང་བར།
ཡ་རེ་ཡོ་རེའི་མི་ཚེ་རྫོགས་པར་འབར།
ར་མ་ལུག་གི་ཆ་ལུགས་དངས་དུ་བླངས།
ལ་ལུང་མི་གཅིག་ཆུང་མ་པང་དུ་བླངས།
ཤ་ཁྲག་གཅིག་པའི་ལས་དོན་རྒྱབ་ཏུ་སྤངས།
ས་སྐལ་ལག་མཐིལ་འདྲ་བོ་དགྲ་ལ་བྱངས།
ཧ་ལོ་ཁྱེད་ཚོ་ཁོང་ཁྲོ་ཨེ་ལངས་སོང་།
ཨ་རིགས་ལ་སོགས་དྲ་གྲོགས་རིགས་གསུམ་ལ།
ཨ་ཡོང་མི་ཡོང་བལྟས་ནས་བསག་འབྲུ་བའི་།
ཧ་ཅང་བཙིར་ནས་བྲིས་པའི་རྩོམ་འདི་བཙངས།
No comments:
Post a Comment