ཁྱེད་ཚོར་རང་བཙན་ཅིའི་ཕྱིར་མི་དགོས།

ཉེ་ཆར་དུས་བབས་ཀྱི་ཟིན་བྲིས་ཐོག་བློ་གྲོས་བརྟན་པ་ཞེས་པ་ཞིག་གིས་རང་གི་བསམ་ཚུལ་ཞིག་བཀོད་འདུག བསམ་ཚུལ་དེ་གང་ཟག་ཅིག་སྒེར་གྱི་བསམ་ཚུལ་ཙམ་ཡིན་ན་འགྲིག་པ་ཡིན་མོད། དེ་དང་ལྷན་དུ་བོད་གངས་ཅན་གྱི་རྩ་དོན་ལ་གནོད་འཚེ་ཞིག་ཀྱང་དྲངས་ཡོང་གི་འདུག་པས་འདིར་དྲ་གྲོགས་གང་མང་ཞིག་གིས་དགོངས་ཚུལ་གསུངས་རྒྱུ་གལ་ཆེན་དུ་མཐོང་ཞིང་དུས་བབས་ཀྱི་བསམ་ཚུལ་ཐོག་ཏུ་མཆན་རྣམས་དུས་ཐོག་ཏུ་འཁོད་ཀྱི་མེད་སྟབས་དྲ་གྲོགས་རྣམས་ལ་དགོངས་ཚུལ་གསུངས་སྟབས་བདེ་ཕྱིར་འདིར་བྲིས་པ་ཡིན། ངའི་ཟིན་བྲིས་ལ་ཕེབས་མཁན་ཚང་མས་འདིའི་ཐོག་དགོངས་ཚུལ་གསུང་བའི་བགྲོ་གླེང་ལ་ཞུགས་པར་ཞུ།
འདིར་ཕྱོགས་བསྡུས་བྱས་ན་གནད་དོན་ཆེན་པོ་གསུམ་ཡོད་པར་སྣང་།
གཅིག ད་ལྟ་དང་འབྱུང་འགྱུར་གྱི་རྒྱ་ཆེའི་བོད་མི་རིགས་ཀྱི་མདུན་ལམ་ལ་ཐེལ་ཙེ་རྒྱག་པའི་དབང་ཆ་ང་ཚོར་ཡོད་དམ། ད་ལྟའི་རྒྱ་གར་འོག་གི་ཀ་ཤི་སྨིར་གྱི་གནས་སྟངས་སོགས་ལ་གཟིགས་རོགས།
གཉིས། དབུ་མའི་ལམ་འདི་ཐག་ཉེར་རག་པའི་རེ་བ་ཆེ་བ་དང་རང་བཙན་འདི་རྒྱང་རིང་གི་སྟོང་བསམ་ཞིག་ཡིན་པའི་རྒྱུ་མཚན་གང་ཡོད། སྐུ་ཚབ་ཐེངས་བརྒྱད་པས་སྤྲད་པའི་ཡིག་ཆ་ལ་རྒྱས་ལན་སྤྲད་པ་སོགས་ལ་གཟིགས་རོགས།
གསུམ། རྒྱ་བོད་རྩ་ཁྲིམས་གཅིག་གི་འོག་ཏུ་བསྡད་ན་རྒྱ་བོད་བར་གྱི་དཀའ་ངལ་སེལ་བའམ་རྒྱས་བོད་ལ་མུ་མཐུད་ནས་ཐུབ་ཚོད་མི་གཏོང་བའི་འགན་ལེན་ཇི་ལྟར་བྱ། འདིའི་འཕྲོས་པའི་དྲི་བ་ནི་འུ་ཅག་གི་ལག་ཏུ་རྒྱའི་རྩ་ཁྲིམས་ལ་འགྱུར་བ་གཏོང་བའི་དབང་ཆ་ཇི་ཙམ་རག་ངེས་རེད། ད་ལྟའི་རྒྱ་ནག་རྒྱལ་ཁབ་ཀྱི་རྩ་ཁྲིམས་སྒྱུར་བཅོས་བྱེད་པའི་རྒྱུད་རིམ་ལ་གཟིགས་རོགས།
དྲི་བ་འམ་གནད་དོན་གལ་ཆེན་པོ་གསུམ་འདིའི་ཐོག་ལ་ཕན་ཚུན་བསམ་གཞིགས་ཀྱིས་ཀླད་པ་དཀྲུགས་རོགས་ཞེས་དྲ་གྲོགས་རྣམས་པར་ཞུ་རྒྱུ་ཡིན།


ང་ཚོས་དབུ་མའི་ལམ་པ་བ་དང་རང་བཙན་པ་ཡག་སྡུག་གི་སྐོར་ཡེ་ནས་མི་གླེང་། ད་ལྟའི་སྐབས་འདིར་བཙན་བྱོལ་བོད་གཞུང་གི་ལངས་ཕྱོགས་ལ་འདི་གཉིས་ལས་གང་བཟང་པ་དེ་གོང་གི་དྲི་བ་འདི་གསུམ་གྱི་ཐོག་ནས་དགོངས་ཚུལ་གསུང་རོགས་ཞུ་རྒྱུ་ཡིན།
ཡ་ད་དྲ་གྲོགས་རྣམས་དང་། ལྷག་པར་བློ་བརྟན་སོགས་ལྗགས་ལན་དང་ལྷན་མགྱོགས་པོར་ཕེབས་ཤོག ཕེབས་མ་ཐུབ་ན་ཁྱེད་ཅག་ལ་བལྟ་ཚུལ་གཞན་ཞིག་མ་བཟུང་ཐབས་མེད་དུ་འགྱུར་སྲིད།
བོད་རང་བཙན་དང་དབུ་མའི་ལམ་གཉིས་ལས་དབུ་མའི་ལམ་འདི་མགྱོགས་པོར་རག་སྲིད་པ་དང་རང་བཙན་འདི་རག་མི་སྲིད་པའི་རྒྱུ་མཚན་ཁུངས་དག་འགོད་རོགས་ཞུས་ཀྱང་ད་བར་དུ་ཅང་མི་འདུག་པས་རྒྱུ་མཚན་མེད་པ་འདྲ། རྒྱུ་མཙན་མེད་ན་དབུ་མའི་ལམ་ཞེས་མིའི་མིག་ལམ་དུ་མཛེས་མཛེས་བྱེད་པ་ལས་བོད་ནང་གི་གཞིས་ལུས་སྤུན་ཟླ་འབུམ་ཕྲག་མང་པོས་སེམས་པ་གསོད་པ་འདི་ཉེན་ཚབ་ཆེ།
ད་དུང་ཁམས་ཕྲུག་འཇིགས་མེད་ཞུ་བ་ཞིག་གིས་“ཐུགས་རྗེ་ཆེ་ཞུ། སྙིང་ནད་སངས་བ་ཞིག་གསུངས་འདུག”ཅེས་མི་ལོ་ལྔ་བཅུ་ང་གཅིག་གི་རིང་ལ་བཙན་གནོན་བྱེད་མཁན་དེ་རྒྱ་ནག་པོའི་སྲིད་གཞུང་འདི་མིན་པར་ངེད་ཅག་གངས་ཅན་པའི་ལས་དབང་ལ་སེམས་རྩ་དཀར་བའི་སྐད་ཆ་ཐད་ཀར་བཤད་མཁན་དག་ཡིན་པ་ལྟར་བྱེད་པ་འདིར་ཡ་མཚན་སྐྱེས་བྱུང་།
ད་དུང་དྲ་ངོས་སུ་ཐོན་པའི་བློ་གྲོས་ཕྱོགས་གཏོགས་རྣམས་ཀྱིས་ རྡུང་གི་ཡིན་མདོག། གསོད་ཀྱི་ཡིན་མདོག། ཚོད་བཟུང་ན་དགའ་སོགས་ཀྱི་སྡིག་ར་དང་། ད་དུང་བཤད་བབས་མང་དག་ཅིག་ལ་བལྟས་ན་ཁྱེད་ཅག་གི་གནས་ཚད་དེ་མཐོང་འོང་བ་ཞིག་རེད། འོན་ཀྱང་ཁྱེད་ཅག་ལ་རྒྱུ་མཚན་དང་བདེན་པ་ཡོད་ན་ངེས་པར་དུ་བཤད་རྒྱུ་དགོས་པ་ལས་དེ་མིན་སྤྱི་ཚོགས་ཀྱི་གླེང་སྟེགས་འདི་འདྲ་ཞིག་སྤྱད་ནས་མི་སེམས་གསོད་མི་ཉན། ལྷག་པར་དུ་གཞིས་ལུས་མི་མང་གི་སེམས་པ་གསོད་མི་ཉན། ཁོང་ཚོའི་རེའི་མིག་འབུར་འདི་ཕྱོགས་སུ་བལྟས་ནས་ཡོད་པ་མཁྱེན་གྱི་ཡོད་ཚོད་རེད།


ཁྱེད་ཅག་གིས་རང་བཙན་མི་དགོས་གསུང་དགོས་པའི་རྒྱུ་མཚན་ཡོད་ན་ངེས་པར་དུ་འདྲེན་རོགས། ད་དུང་ནི་དུས་ཚོད་མང་པོ་སྒུག་གི་མིན། རྩོད་པ་འདི་མི་སོ་སོའི་བལྟ་ཚུལ་མ་མཐུན་ཙམ་གྱི་ཁྱད་པར་ཡིན་པའི་རེ་བ་ངས་བྱེད་ཀྱི་ཡོད། བལྟ་ཚུལ་མི་མཐུན་པ་ལ་སྦྱང་བཤད་བྱས་ནས་གོ་བརྡ་འཕྲོད་རྒྱུ་ཡོད་དོ།