མི་འདོད་ཐོག་བབས-ལས་དབང་གི་འཁང་ར་།

ངག་ནས་འཁྱལ་བའི་ཚིག་སྐམ་འགས།
ཤི་ཟིན་པའི་ཚེ་སྲོག་སླར་གསོ་མི་ཐུབ་ལ།
ཤུལ་ལྷག་པའི་གསོན་པོའི་སེམས་སྡུག་སངས་མི་ཐུབ།
འོན་ཀྱང་དགེ་མཐོང་གིས་ཕན་ཐོགས་ཤིག་མཐོང་བས།
ངས་རམ་འདེགས་ཤིག་བྱས་པ་ཡང་འོས་པར་མཐོང་།
འོན་ཀྱང་ང་ལ་ངུ་བའི་མིག་ཆུ་མེད་དེ།
ངའི་མིག་ལས་མཆི་མ་བསྐམས་ཟིན།
ང་ལ་སྒྲོག་པའི་ངུ་ངག་མེད་དེ།
ང་ངུས་ནས་གྲེ་བ་འགགས་ཟིན་།
ན་ནང་མི་ནག་ཚང་གི་གཅར་རྡུང་དང་གདུག་རྩུབ།
དོ་ཚིགས་ས་ནག་ཡུལ་གྱི་ཡུལ་སྐྱོམ་དང་གཏོར་བཤིག
ད་ཆ་ཡང་ཆུ་ནག་བཞུར་བས་ལ་བཤག་དང་ལུང་བཤག
ད་དུང་རླུང་ནག་དང་མེ་ནག་་་་
གཞན་གང་ཞིག་གིས་མདུན་ན་སྒུག་ཡོད་མེད་སུས་ཤེས།
བོད་གངས་ཅན་གྱི་ལས་དབང་འདི།
སུ་ཞིག་ལ་གཟིགས་འབུལ་ཞུ་འམ།
ན་ནང་བཟི་ཚ་དང་དོ་ཚིགས་ཡུལ་ཤུལ།
ད་ལྟ་འབྲུག་ཆུ། འོ་་་ད་དུང་ལ་དྭགས།
རང་རེའི་ཡུལ་གྲུ་འདིར་མི་འདོད་ཀྱི་ཟོ་ཆུན་སྟར་བ་འདིར་
ངས་ལས་དབང་ལ་འཁང་ར་ཞིག་བྱེད།